Ut ontstoan van de Bacchusklup Beesel
Ut waas ± januari 1999, Sybil zoot nog in De Aaij Mert, toen Jan en Marly Cruysberg van ein optreije van de Bacchusklup in Remunj aafkwame, en bie Sybil noa binne kwame veur nog get te drinke. Det veel toen teage, bie de Bacchusklup in Remunj waas ut volle bak en leave de lol. Jacky mit inkele vrunj (Kloeke 97) zoote der mit un langk gezich bie want der waas in ut Beeselse dörp nieks te beleave veur de jeug. De CV en de jeugroad ware al noar hoes, dus haaije ze planne gemaak veur un alternatieve road van 11 te stichte, zodet der aug get te doon waas veur de jeug van Beesel zodet die aug in eige dörp blieve tiedes de vasteloavendj. Jan vonj det gin good plan, der waas un road van 11 en un jeugroad det waas genog veur ut dörp. Hea opperde toen det der un Bacchusklup wearde opgerich.
Ein Bacchusklup?! Wat is un Bacchusklup wearde der gevroag. Nou zei Jan: Bacchus is de god van de drank. En Bacchus mit zien klup lupt als un roeije droad door de vasteloavendj en trekt zich nurges get van aan. (toet op zekere heugte)
Ze zooge ut waal zitte dus de Bacchusklup wearde opgerich. Maar toen kwaam ’t. wie doon veur ut? Veur hubbe nieks… der wearde aangewerkt, Marly maakte ut iërste Bacchuskleid met mantjel en de adjudantenkleijer. Ut mos snel gebeure want de vasteloavendj sting veur de deur. Jan maakte un aafsproak mit de Bacchusklup in Remunj, samen mit Marly hubbe ze eine oavend bie ein gezeate om der euver noa te dinke: wie zitte we dit op zodet de jeug hie joare mit veuroet kent.
Aug wearde der un Bacchusleed gemaak dit wearde ingezonge bie Music House in Mestreech.
Luc Verstappe wearde de iërste Bacchus, zien adjudante ware Pascal Storms en Pietje Geerlings. Ut wearde inderdaad un groët succes en de jeug vonj ut geweldig. CV de drake echter minder, want waas der receptie van de prins en sting der un lange rieij veur te felicitere den zoot Bacchus zien cd op en leep met de ganse klup in polonaise noa veure om de prins un hendje te geave, want unne Bacchus wacht neet. Det wearde dus neet in dank aafgenoame maar de jeug vonj ut geweldig en de Klup greuide.
De Aaij Mert wearde toen ut Bacchushoes, pas toen De Aaij Mert geslaote wearde is dit verplaats noa ‘’de Troubadour’’.
Toet op de daag van vandaag is de Bacchusklup in Beesel un begrip, veural bie de jeug en veur de Beeselse Vasteloavendj.
